1 PEDRO 5:10
Pero despues di a sufri pa un tempu kòrtiku, Dios mes lo restourá, fortalesé i fortifiká boso; lo E establesé boso riba un fundeshi fuerte. Ta e mesun Dios, fuente di tur grasia, a yama boso, pa toka parti den su gloria eterno den union ku Kristu-Hesus.
Dios ta fuente di Grasia i Hesu Kristu ta fuente di amor i fe. E palabra ‘fuente’ ta e bron (DIOS) kaminda tur kos ta sali foi Dje. E echo sobrenatural aki ta inspirá nos komo yunan di Dios. Pesei mes nos ta kere ku ministerio radial tambe por sirbi manera un fuente pa esnan ku tin set i hamber di e palabra.
Sigur e radio por ta un fuente digital kaminda nos por manda e Evangelio di Grasia den aire. Pues komo Dios ta E Fuente di Grasia meskos tambe e radio por ta un Fuente digital di Grasia. Nos motivashon ta pa anunsiá e mensahe di rekonsiliashon na mundu henter (2 Korintionan 5:14-21).
1 TIMOTEO 1:14
Pero Dios a tene mizerikòrdia ku mi, pasobra ami, ku e tempu ei no tabata un kreyente, no tabata sa kiko mi tabata hasi. 14 I nos Señor a drama su grasia abundantemente riba mi i a duna mi fe i amor di kua Kristu ta e fuente.
20 P'esei ata nos aki komo representante di Kristu; Dios mes ta usa nos pa hasi su apelashon na hende. Nos ta roga boso den nòmber di Kristu: laga Dios rekonsiliá boso kunÉ!
Testimonio pareha frans
Kon nos bida tabata sin Kristu?
David a nase na Boneiru i a lanta serka su wela, tio i tantanan den un famia na Rincon. Sally a nase na Korsou, i despues di tempu ela bai biba serka su wela na Lagun Boneiru. Apesar ku ambos di nos a haña un base spiritual i un bon kriansa na kas, nos a desvia di e kaminda rekto. Asina nos a bin topa diferente opstakulonan, problemanan i sirkumstansianan pisá den bida. Partialmente esaki tabatin di haber ku nos manera debil di pensa i konsekuentemente nos kondukta a wordu influensia hopi dor nos amigunan i e mundu di maldat. Tin biaha hasiendo algu kontra boluntad di Dios djis pa komplase otro i pertenese na e grupo.
Kon nos a bin aseptá Kristu?
David ta konta: Den añanan 90, “mi mama un dia a introdusími na un pastor di un iglesia Pentekostal na Boneiru i einan mi a bin asepta Kristu den mi bida pero mi no a permanese riba e kaminda.
Despues di tempu, na Hulanda, mi a bin aseptá un invitashon pa bai iglesia Pentekostal atrobe i mi a bin arepenti di tur mi pikánan i kuminsa un bida spiritual strukturá. Despues mi hiba mi famia kompletu iglesia, kaminda Sally i e muchanan a duna nan bida na Kristu tambe.
Kon nos bida ta awo den Kristu?
Sally: “Poko poko Dios a bin kambia nos bida ku te asta David a logra dos estudio na nivel di HBO i na 2011 nos a regresá Boneiru. Einan nos a bin konose Pastor Brunk di iglesia Ministerio di Grasia Boneiru i nos a kuminsa bai su iglesia di Grasia. Ei mi a bin realisa ku Dios tabatin enberdat un miho plan pa mi bida!”
David: “Un tempu mi tabata konfia den mi mes konosemente mi no por a mira e plan ku Dios tabatin prepara pa mi bida. Mi wowonan tabata tapá, te ku porfin mi a bin KOMPRENDE e nifikashon di e bon notisia.
Einan mi a realisá ku no ta pa medio di mi mes esfuerso mi ta salbá, pero pa medio di Grasia."
Famia Frans: “Maske kuantu kontratiempu i lucha (taba)tin durante di e trayektoria, nos a keda ku speransa ku un dia Dios lo transforma nos bida por kompletu ya asina nos por sigui Kristu Hesus riba e kaminda ku ta hiba na salbashon. Na Señor tur honor i gloria. Amen"
Sirbishi na Dios
Bou di guia spiritual nos a fungí komo ko-presentadónan di e programa radial “Bo Bida Kristian Salú” na un radio FM di Boneiru.
Aktualmente nos ta biba na Hulanda bèk kaminda nos a kuminsá un minsiterio radial nobo, yamá “Radio Fuente di Grasia”.